Нэг инээдтэй зүйл хэлэхэд АН МАН-тай биш МАХН-тай гэрээ байгуулсан

АН-ын ҮЗХ-ны хурлаараа хамтарсан Засгийн газраас гарах болсон тухайгаа мэдэгдсэн. Шийдвэртэй холбоотой асуудлаар УИХ-ын гишүүн  Р. Амаржаргалтай ярилцлаа.

-АН хамтарсан Засгийн газ­раас албан ёсоор гарахаар боллоо. Энэ шийдвэрийн та­лаар та юу хэлэх вэ?

-Би энэ асуудлыг жилийн өмнө ярьж байсан. Тухайн үед бид ийм шийдвэр гаргах цаг нь өнгөрчи­хөөд байна гэж байсан. Оройт­сон ч гэсэн ийм шийдвэр гарсанд баяртай байна.

-Хамтарсан Засгийн газ­рын бүрэн эрхийн хугацаа дуу­са­хад зургаан сарын ху­га­­цаа үлдсэн байлаа. Үйл ажил­­лагааны тайлангаа 100 хувь тавих байсан АН гэнэт Хам­­тарсан Засгийн газраас гарч, замаасаа буцаж бай­гаа нь хариуцлагаас мултарч байгаа хэлбэр гэсэн шүүмж­лэл байгаа?

-Тийм хэмжээний улс төр хийхээ МАН мэднэ. Тэр бол нээх гайхаад байх шинэ зүйл биш. Харин ч ийм зүйл яриагүй бол бид гайхах байсан юм. Би нэг зүйлийг хэлье гэж бо­дож байна. Энэ хоёр намын хамт­ран ажиллах гэрээнд заасан зүйлүүдээс биелэгдэх бо­ломж­той зүйлүүд нь бүгд биел­сэн. Биелэгдээгүй үлдсэн гэж хэлж байгаа тэр зүйлүүд нь то­дорхойлолтоороо биелэгдэхгүй зүй­лүүд. Тиймээс үүнийг бие­лүүл­­нэ. Үлдсэн зургаан са­рын ху­га­цаанд амжуулна гэж байгаа нь тархи угаах гэж үйл ажил­­ла­гаа. Тиймээс ингэж ард ир­­гэ­дээ басамжилж, худлаа ярьж болохгүй. Бид хийж ча­дах зүйлээ хийгээд, чадахгүй зүйлээ то­дорхойлолтоороо ча­дахгүй юм байна гэдгээ сая хэллээ.

-Өнгөрсөн гурван жил га­руйн хугацаанд хамтран ажил­­­лахдаа эрх баригч нам хэр шударга ажилласан бэ. Өөрөөр хэлбэл, томилж байгаа сайд нар, бодлогын төвшинд ямар байсан бэ?

-Хоёр өөр үзэл баримтлалтай улс төрийн хүчин хамтарч ажил­лахад мэдээж зөрөлдөх зүйл байна. Аль алинынхаа онцлогыг тусгаад явах хэцүү. Гэхдээ бид өөрсдийн тавьсан зорилтоо биелүүлэхийн төлөө чадлынхаа хэрээр ажилласан. Ямартаа ч ирэх сарын 1-нээс эхлээд Монгол Улсын иргэн бүрийн нэр дээр сая төгрөгийн хувьцаа орж ирнэ. Бид энэ заалтаа биелүүлж чадсандаа сэтгэл хангалуун байна. Хувьсгалт намын бэлэн мөнгөний асуудал яах нь бидэнд сонин биш. Тэд өөрсдөө шийднэ биз.

-Хоёр намын байгуулсан гэрээний 5.3-т аль нэг талын санаачилгаар гэрээг цуцлах эрх зүйн орчин байхгүй гэдгийг тусгасан байдаг. Энэ гэрээний заалт яах юм бэ?

-Тийм. Гэхдээ энэ заалтын өмнө аль нэг нам нь ямар нэгэн зөрчил үүссэн гэж үзвэл Хамтарсан Засгаас гарах санал гаргаж болно гэсэн байгаа. Тиймээс энэ дээр асуудалгүй.

-Энэ заалт дээр дөрөөлөөд Ардчилсан нам Хамтарсан Засгийн газраас нэрээ татсанаар Засгийн газар бүрэн бүрэлдэхүүнээрээ огцрох ёстой. Учир нь талууд харилцан зөвшилцөж энэ шийдвэрийг гаргаагүй гэсэн яриа байгаа?

-Нэг инээдтэй зүйл хэлье. Та нар битгий гайхаарай. Хамтарсан гэрээг бид амьхандаа МАХН-тай байгуулсан. Тэгтэл одоо МАХН байхгүй болчихсон. Тэгэхээр энэ гэрээг одоо дүгнэхэд хэцүү болж байгаа юм. Нарийндаа ярьвал, энэ гэрээнээс зугтаж гарсан нь МАН шүү дээ.

-Намын зарим гишүүдийн зүгээс АН Хамтарсан Засагт орж ажилласнаар баруун төвийн үзэл баримтлалаа алдаж, хоорондоо уусах үзэгдэл ажиглагдсан гэдэг?

-Тэр үнэн. Хэтэрхий хавтгайрсан халамжийн бодлого бид өнгөрсөн гурван жилийн хугацаанд явуулсан. Эцэстээ энэ маань нийгмийг сүйтгэх хэмжээнд хүрч, халдварт өвчин шиг болж түгшүүр зарлахаар боллоо. Ийм замаар бид цааш явж болохгүй нь. Нийгмийн баялаг нэмэгдэхийн хэрээр эдийн засгийн өсөлт байгаад байна гээд байгаа боловч яг хаана нэмэгдээд байгаа нь мэдэгдэхээ болилоо. Ядуурал нь нэмэгдээд байна. Хамаг юм нь сайхан болоод байна гэж яриад байгаатай огт авцалдахгүй байгаа. Энэ нийгмийн баялагын хуваарилалтыг шударга болгох асуудлыг бид нэгт тавих ёстой. Дараа нь нийгмийн баялагыг хүртээд байгаа 20-30 хувь нь үлдсэн хэсэг буюу ард түмнийхээ амийг бариад 21 мянган төгрөгийг авч бай, дээрээс нь жаахан юм өгье, өшөө жаахан чанга дуугарвал дахиад жаахан юм өгье гээд л амыг нь таглаад ийм л зүйл рүү явах гээд байна. Үүнийг хүлээн зөвшөөрч болохгүй. Манай намын үзэл баримтлал, үнэт зүйлс энэ бүхэнд нийцэхгүй. Бид ажил хөдөлмөр гэдэг зүйлийг л эрхэмлэх ёстой. Үүн дээрээ тулгуурлаж хүн баян чинээлэг амьдарна. Энэ үзэл баримтлалаа үнэхээр бид мартсан. Тиймээс энэ бүхнээ эргэн санаж, унаган хөрсөн дээрээ буух цаг болсон.

-Нэгэнт Засгийн газраас нэрээ татах шийдвэр ҮЗХ-ны хурлаар баталгаажсан тул Ардчилсан намыг бензин, шатахууны үнийн өсөлтөд бүр илүү буруутгах хандлага ажиглагдах байх?

-Тэр бол МАН-ын ганц чаддаг юм. Хэн нэгэн буруутанг олж тэр хүн дээр бүх зүйлийг наадаг. Энэ бол гайхамшигтай шинэ зүйл биш. Үүн дээр АН хамаагүй. Харин аз таарч манай намын даргын мэдэгдэл урд өдөр нь гарсан.

Эх сурвалж: Монголын мэдээ, 2011 оны 1 дүгээр сарын 12, сэтгүүлч Б.Саран